Националниот џез-оркестар на 18 март, во 20 часот, во Националната опера и балет, ќе ја има ексклузивната чест да го изведе најновиот проект на Мајк Холобер со наслов „This Rock We’re On: Imaginary Letters“, под диригентство на самиот автор.

Мајк Холобер е еден од најзначајните современи џез композитори и аранжери, препознатлив по својата виртуозност, изразена оркестарска визија и длабока музичка чувствителност. Неговиот проект „This Rock We’re On: Imaginary Letters“ е оценет како „монументално ремек-дело“ и „мајсторска лекција по композиција за џез-оркестар“.

Во ова дело, Холобер создава впечатлив спој на два музички света, вметнувајќи ја суптилната естетика на современата класична музика, нагласена преку интимната камерна звучност на виолончелото, пијаното, вибрафонот и вокалот, во моќната и динамична енергија на биг-бендот.

Делото претставува длабока уметничка рефлексија за убавината на природата и судбината на планетата. Конципирано е како циклус од таканаречени „замислени писма“ посветени на писатели, уметници и активисти кои својот живот го поминале во восхит и грижа за планетата. Секое „писмо“ е проследено со инструментална оркестарска интерпретација што ја продлабочува и музички ја отсликува неговата содржина и поетска димензија.

Како солисти на концертот ќе настапат Андријана Јаневска (вокал), Кирил Јосифов (виолончело) и Влатко Нушев (вибрафон и перкусии), додека како гости ќе настапат и младите вокални солисти Лени Туфекчиевска и Нино Наумовски.

Овој концерт претставува ретка можност да се доживее комплексноста и длабочината на проектот на Холобер во живо, под негово диригентство, во изведба на Националниот џез-оркестар и гостите-солисти.

(Текстот е објавен во „Културен печат“ број 324, во печатеното издание на весникот „Слободен печат“ на 14-15.3.2026)