Владата на Република Северна Македонија има назначено 15 Национални координатори и нивни заменици. Од Владата велат дека назначувањето на Национални координатори не е нова функција, ја има во секоја влада, а нивното назначување е со цел да го подигнат нивото на координација во областа на повисоко ниво. Практично координатор во одредени области. „Слободен печат“ ја праша Владата за висината на платата која ја добиваат и по кој коефициент се пресметува, но конкретен одговор не добивме.

-Надлежностите на националните координатори произлегуваат од материјалните закони и политиките на Владата, висината на платата која ја добиваат е согласно Одлука за пресметување на платата на функционерите кои ги именува Владата- велат од таму.

На веб- страната на Влада може да се видат имињата на 11 Национални координатори и тројца заменици. Владата вели дека има 15.

Според Влада, координаторите и нивните заменици се назначени во различни област, а биографиите можат да се најдат на веб-страницата на Владата.

-Владата може неограничено да назначува национални координатори во областите во кои работи и оваа функција постои и не е нова. Во овој момент Владата на Република Северна Македонија има назначено 15 национални и заменик-национални координатори- објаснуваат од Владата.

Така, во државава има Национален координатор за гранично управување, но има и в.д. Заменик национален координатор за гранично управување. Потоа има Национален координатор за спречување на насилен екстремизам и борба против тероризам. Овде има дури двајца заменици. Во одделот здравство има двајца, едниот е Национален координатор за трансплантација, а другиот Национанален координатор за имунизација. Потоа има Национален координатор за Отворен Балкан и за регионални иницијативи, Национален координатор за имплементација на националната платформа за намалување на ризици од несреќи и катастрофи на Република Северна Македонија, но и Национален координатор за одговорно владеење и транспарентност.
Потоа има Национален координатор за регионална соработка и европски интеграции, за интеркултурализам, едно општество, развој на културата и меѓуресорска соработка, Национален координатор за медијација, како и Национален Координатор за информатика и енергетика.