Во НУ Центар на култура „Трајко Прокопиев“ – Куманово на 20 октомври, со почеток во 20 часот, ќе биде отворена изложба на скулптури со наслов „Акт“ на ликовниот уметник Ненад Тонкин.

Изложбата содржи осум скулптури од последните два циклуси на уметникот. Ова е 9-та самостојна изложба на Тонкин и во галеријата ќе биде поставена до 3 ноември 2022 година.

– „Акт“ е изложба на скулптури, со мал и голем формат, кои се дел од два циклуси изработени и изложувани во различни периоди. Скулптурите одбрани да бидат дел од овој концептот ги спојува една главна карактеристика – фигурацијата, односно приказ на човечко тело. Другата важна заедничка особина за овие дела е што се изработени исклучиво со употреба на рециклирани материјали, отпад и ready-made / ready-found објекти.

Актот како ликовен мотив е многу честа појава во ликовното творештво. Претставено преку различни видови уметнички стилови, од класичен до апстрактен, човечкото тело е вечна инспирација за истражување и создавање. Во рамки на овој концепт уметникот се обидува да го претстави човечкото тело преку една друга, нетипична перспектива на набљудување на формата и суштината на телото. Така, има скулптури чие создавање е инспирирано од детски цртежи каде не се истакнува анатомијата и пропорциите на човечкото тело туку првенствено е запазен детскиот слободен и креативен израз.

Има и такви скулптури кои се создадени врз основа на одредени чувства на уметникот или, пак, скулптури кои се вид на илустрација на негови претрпени стравови, од детството, но и актуелни. Сепак, сите тие имаат или барем се трудат да имаат некаков облик со одредени карактерни црти и лик својствени за човечкото тело – појаснува ликовниот уметник Ненад Тонкин.

Ненад Тонкин е воспитувач во градинка и академски скулптор. Неговата магистерска теза од областа на скулптурата го истражува и анализира уметничкиот предизвик при создавање скулптури инспирирани од цртежи на деца од градинка. Работел во детска градинка како воспитувач. Одржал и креирал неколку детски ликовни работилници.

Изработува скулптури исклучиво со употреба на рециклирани материјали и најдени готови предмети. Реализирал повеќе самостојни и групни ликовни изложби во земјата и странство. Насликал неколку мурали со поголеми димензии.

Дизајнира сценографија за театар. Автор е и на музика за неколку театарски претстави. Компонира и издава своја авторска музика под псевдонимот Mammoth & Yashem. Бил член на музичката група „Bei the Fish“. Роден е и живее во Скопје.