За време на празничните денови на Клиниката за детски болести во просек имало 150 прегледи дневно, вели за „Слободен печат“ директорката на Клиниката, доктор Валентина Цвејоска-Чолаковска. Во моментот хоспитализирани се околу 90 деца, но немаат сите акутна патологија, туку има и пациенти на хемато-онколошкото и на ендокринолошкото одделение. Сепак, како што потврдува директорката Цвејоска-Чолаковска, за време на викендот и овие денови, голем е напливот и на деца со акутни респираторни инфекции, односно со дијагнози на горнореспираторни инфекти, настинки, бронхитис, риносинузити и тонзилофарингити.

– Годината ја завршивме и новата ја започнавме со зголемен обем на работа. Празничниот викенд имаше деца доминантно со респираторни симптоми, кашлица и покачена температура. Се наоѓаме во сезона на грип па до некаде напливот на пациенти е очекуван. Негативно влијание секако има аерозагадувањето, чадот и маглата и препорака од нас лекарите е да не се групираат децата во затворени простории, да се обрне внимание на личната хигиена, на хигиената на рацете и на респираторните секрети, што повеќе да се конзумира здрава храна, овошје и зеленчук, да се престојува на планина околу местата на живеење за да се искористи чистиот воздух и сонцето, ни изјави директорката.