Мултимедијалниот перформанс „Триптих“ донесе фузија од три уметности на скверот „Јас и ти“

Пијанистката Дуња Иванова, кореографката Јована Зајкова и слем-поетот Горазд Китановски ги обединија современиот звук и танцовиот перформанс проникнат низ мислата на Горан Стефановски.

Во четвртокот во скопската населба Дебар маало се одржа перформансот „Триптих“ во чест на драмскиот писател Горан Стефановски, во кој учесниците Дуња Иванова, Јована Зајкова и Горазд Китановски ги обединија современиот звук за пијано, танцот и поезијата низ мислата на Стефановски.

Тројцата уметници заедно создадоа едно ново естетско искуство, без никакви ограничувања и страв дека тоа треба на некаков начин да се разбере.

Иванова е магистер по пијано, доктор на науки по филозофија, професор и автор. Позната е по тоа што сака да излезе на јавни простори и да ги изнесе современите класични композитори пред случајните минувачи, за слушателите да излезат надвор од концептот и да не се подготвуваат за уметноста пред да ја восприемат. На репертоарот на „Триптих“, Иванова отсвире колаж од делата на Јан Тирсен, Макс Рихтер, бендот „Рејдиохед“, делата на Лудовико Еинауди и уште неколку припадници на постминимализмот.

– Творечкото битисување на Горан Стефановски, иако пред децении проникнато, денес сѐ уште и одново го огледува секојдневието. Музиката на постминимализмот претставуваше извесен контрапункт, пркос кон вечните дилеми како најмоќно оружје за менување на нештата – вели Иванова за „Културен печат“.

Творечкото битисување на Горан Стефановски, иако пред децении проникнато, денес сѐ уште и одново го огледува секојдневието – вели пијанистката Дуња Иванова

Зајкова е танчарка и кореографка од Скопје. Дипломира при Универзитетот „Гоце Делчев“ во Штип на катедрата за современ танц, a настапува на реномирани фестивали во Македонија и во странство. Својата експресија преку танцот сака да ја споделува со случајните минувачи, исто како што и Иванова прави со пијанистичките настапи.

– Драго ми е што имав прилика да бидам во ситуација во која не постои бариерата помеѓу изведувачот и публиката. Творештвото на Стефановски е живо, актуелно, игриво, безвременско, од луѓето и за луѓето и можноста да се сподели истото со публиката на толку интимно ниво беше навистина посебно искуство – ни изјави Зајкова.

Творештвото на Стефановски е живо, актуелно, игриво, безвременско, од луѓето и за луѓето – истакна кореографката Јована Зајкова

Младиот луциден уметник Горазд Китановски – Кени е третиот член на овој перформанс. Освен автор и поет, тој е и национален победник во слем-поезија за 2021 година.

– Утопскопски, слободно, пријателски. Чудесна енергија има кога бината ја селиш на улица, со случајните минувачи, во случајов со Дебар Маало – ни изјави Кени по настанот. Проектот е дел од Годишната програма за култура на Министерството за култура на РС Македонија.

(Текстот е објавен во „Културен печат“ број 129, во печатеното издание на весникот „Слободен печат“ на 21-22 мај 2022)

Видео на денот