Мултимедијална изложба ќе биде поставена во битолската „Магаза“
Отворањето на мултимедијалната изложба „Нови естетики, нови простори“, на која ќе бидат претставени пет современи уметници: Моника Мотеска и Роберт Јанкулоски од РС Македонија, заедно со Весна Перуновиќ, Стеван Којиќ и Божo Васиќ од Р Србија, со нивни дела од областа на видео, фотографија, дигитална анимација, дигитален цртеж, објект, инсталација, амбиент, ќе се одржи на 22 септември, во 19 часот, во КЦ „Магаза“ во Битола.
Уметниците претставени преку овој проект се движат во проширеното поле на уметноста, а нивната практика се одвива преку мултимедијални и интердисциплинарни истражувања, подготвени за дијалог на различни технички и технолошки процедури, посочија од НУ Завод и музеј Битола.
Уметниците припаѓаат на средната генерација и веќе имаат богати биографии на изложбени активности, бројни награди, меѓународно искуство и значајни истражувања во областа на визуелната уметност.
Куратор на изложбата е Светлана Младенов, а истата ќе биде поставена од 22 септември до 5 октомври во КЦ „Магаза“ во Битола.