Милев: Со помалку грешки до нови успеси во европските натпревари
Македонскиот одбојкарски првак Струмица малку недостасуваше да го елиминира холандскиот Динамо Апелдон во квалификациите на Лигата на шампионите.
По поразот на првиот меч со 3:0, на реваншот во Скопје нашиот претставник триумфираше со 3:1, по што патникот за следната фаза се одлучуваше во „златниот сет“ во кој ривалите беа подобри со 15:13.
Струмичани ќе го продолжат меѓународниот настап сезонава во октомври во Купот на ЦЕВ каде за противник го имаат хрватскиот составот на Мурса од Осиек.
Еден од најискусните играчи на тимот, Владо Милев се надева на нови позитивни резултати во следниот период.
– Одигравме добар натпревар, беше еден доста тежок натпревар. Среќен сум што бевме подобри во мечот, ова е еден прв чекор на нашата клупска одбојка, со намера да го подигнеме нивото. Немавме среќа во „златниот сет“, ни недостасува искуство, воиграност. Имаме нова екипа, сметам дека имаме перспектива. Доколку работиме добро, и доколку се посветиме, да ги поправиме грешките, мислам дека можеме да се радуваме на успеси во понатамошните натпревари од европските купови – вели Милев.