Кривичниот совет соопшти дека го прифаќа предлогот на Обвинителството и му определува 30-дневен притвор на обвинетиот Сашо Мијалков.

Постапувајќи по предлог на Основното јавно обвинителство за организиран криминал и корупција за определување мерка притвор против С.М., обвинет во предметот со КОK бр. 63/21 во јавноста познат како „Плацови на Водно“, а имајќи ја предвид итноста на постапката, Кривичниот совет, по добивање на предметот, одржа седница на советот и донесе решение со кое го прифати предлогот на Јавниот обвинител и на обвинетиот му определи мерка притвор во траење од 30 дена.

Јавното обвинителство попладнево побара притвор за Мијалков за случајот „Плацови на Водно“, откако со одлука на Апелацискиот суд, тој беше ослободен.

Советот соопшти дека смета оти се исполнети условите од чл. 165 ст.1 т. 1 односно дека постои опасност од бегство.

Решението е во фаза на експедирање до странките во постапката кои имаат право на жалба пред Апелациониот суд Скопје.