Не би сакал сега јавно да зборувам за имињата на тие лица, тоа би било многу несериозно, рече претседателот на ВМРО-ДПМНЕ на денешната прес-конференција, одговарајќи на новинарско прашање за формирањето на новата Влада.

-Врз основа на сведочењата на луѓето на кои им е пристапено, јас само предупредив дека лица пришле на пратениците од ВМРО-ДПМНЕ и тоа е нормално. Нормално е да се пристапи, да се рече видете ваква програма нуди СДСМ, но шест-седум цифрени бројки во странска валута и ветувања за привилегии, со понуда дека утре ви е обезбедена средба со врвот на раководството на СДСМ, тоа предизвикува згрозување кај слушателот, кој е пратеник од нашата коалиција и кај мене. Се надевам дека ова ќе бидат неуспешни епизоди кои оставаат флека на демократските процеси во државата и дека нема да се повторат, рече Мицкоски.

Тој рече дека во текот на вчерашниот ден немале средби и разговори со претставници на другите политички партии за формирање на парламентарно мнозинство, но најави дека во следните денови тоа ќе се случи.