Порота на суд во Калифорнија ја отфрли тужбата на Илон Маск против организацијата творец на „Четџипити“, „ОпенАИ“ и нејзиниот извршен директор Сем Алтман. Со едногласна одлука, случајот бил отфрлен бидејќи Маск ја поднел тужбата по истекот на законскиот рок, пишува Би-би-си.

Маск го обвини Алтман за прекршување на договорот за непрофитна организација, тврдејќи дека „ОпенАИ“ е претворена во профитна компанија откако тој ѝ донирал 38 милиони долари.

Според тужбата, Алтман го измамил да ја прифати донацијата, само за потоа да „се откаже од првичната мисија на „ОпенАИ“, која е да развива вештачка интелигенција во корист на човештвото“.

За време на тринеделното судење, поротниците разгледаа интерна кореспонденција и слушнаа сведоштва.

Меѓу сведоците беа Маск и Алтман, како и извршниот директор на „Мајкрософт“, Сатја Надела, кого Маск го обвини и за учество во наводната измама. Пресудата беше донесена по приближно два часа одлучување.

Со оглед на одлуката на поротата во случајот против „ОпенАИ“, тврдењата на Маск против „Мајкрософт“ исто така беа автоматски отфрлени.

Маск и Алтман го основаа Опен АИ во 2015 година, но Маск ја напушти компанијата во 2018 година откако неговите коосновачи одбија да му ја отстапат целосната контрола.

Маск најави дека ќе ја повлече понудата за Опен АИ доколку компанијата остане непрофитабилна