Се докажа дека КОВИД-19 не ги исплаши многу македонските гласачи. Над 50 отсто е сосема солидно и може да се тврди дека секоја наредна влада ќе има легитимитет. Резултатот не ме изненади премногу. Сега следи еден период на пазарење, натегање. Изненадување е Левица и се покажа дека ова ќе биде многу тесна битка, изјави во „Утрински брифинг“ на „Слободна ТВ“ универзитетскиот професор Ненад Марковиќ.

-Се надевам дека меѓу-етничките тензии ќе се тргнат на страна и ќе се бавиме со прашања кои се поконструктивни и поконкретни – како што се екологијата и куп други прашања. Страшна грешка беше што премногу се отиде на негативна кампања и луѓето не ги ни слушнаа пораките кои што политичарите им ги праќаат- смета Марковиќ.

Тој мисли дека СДСМ ќе имаа поголема разлика доколку не беше КОВИД-19 и комликациите со вториот бран.

-Тоа секако негативно влијаеше на нивниот рејтинг. Тие имаа една очекувана кампања, не претерано многу црна. Ме изненади кампањата на ВМРО-ДПМНЕ. Посебно негативната. Пробале нешто да прават, на едноставен начин да ги адресираат пораките, но на моменти тоа знаеше да се претвори во малку дегутантна „спрдачина“- изјави Марковиќ.

Околу перспективата на новата влада, под услов да ја прават доминантно СДСМ и ДУИ и положбата на ВМРО-ДПМНЕ во целата ситуација, Марковиќ смета дека многу тешко ќе биде да се седнат Села и Ахмети во иста влада.

-Тоа ќе биде фрикција и веројатно ќе има потреба од меѓународен приотисок. дали бил фингиран судирот помеѓу СДСМ и ДУИ ќе биде детерминирано од брзината на преговорите. Ако брзо се договорат тоа значи дека се разделиле за да си регрутираат гласачи во сопствениот кампус. Доколку подолго траат преговорите тоа значи дека имаат навистина проблем, смета Марковиќ.

Сметам дека Мицкоски нема да се повлече, потенцираше тој.

-Не разбирам лидер на опозиција да не ги оспори гласовите, да рече дека имало местенки и за тој мал пораз да створи алиби. Ме чуди тоа што тој не се појави вчера на прес-конференција. Но сметам дека ако Мицкоски преживее до локалните и ВМРО-ДПМНЕ направи некаков кам-бек на истите, можеби тој ќе го продолжи лидерство во партијата.