Инстант нудлите со вкус на пилешко на „Индоми“ се повлечени од пазарот во Тајван и Малезија откако здравствените власти откриле дека содржат етилен оксид, кој може да предизвика рак.

Етилен оксид е гас без боја и мирис и се користи за стерилизирање медицински помагала.

Индонезискиот прехранбен гигант ја бранеше безбедноста на своите производи по повлекување на брендот.

„Сакаме да нагласиме дека нашите инстант тестенини „Индоми“ се безбедни за конзумација, рече членот на одборот на Индофудс, Туфик Виратмаџа.

Генералниот директор за надворешна трговија на Индонезија, Буди Сантосо, на прес-конференција изјави дека локалните власти „веднаш ги провериле“ повлечените производи и утврдиле дека се безбедни за потрошувачка. Тој додаде дека прописите на Тајван се „многу чувствителни и различни“ во споредба со оние во Индонезија.