Францускиот претседател Емануел Макрон ги повика Французите да издржат уште еден до месец и пола, пред да ги почувствуваат првите олеснувања во актуелната здравствена криза, јави дописникот на МИА.

Дваесет француски департмани се под засилен надзор и може да бидат предмет на заострување на ограничувањата во наредните денови, а културните работници утринава повикаа на отворање на културата, една година по првите затворања и откажувања на настаните.

Заедно со новите ограничувачки мерки што би можеле да се воведат, извршната власт работи на зголемување на вакцинацијата, особено меѓу најранливите и медицинскиот персонал, со цел да се обиде да го намали притисокот врз болниците. Жан Кастекс во четвртокот објави дека кон средината на мај, на сите лица  над 50 години ќе им биде понудена прва инјекција против ковид-19.

– До крајот на март две третини од луѓето над 75 години ќе бидат вакцинирани, рече премиерот.

Шефот на државата, исто така, планира неделава да одржи состанок со членовите на владата за да подготви воспоставување на здравствен пасош, со цел повторно отворање на културни места и ресторани затворени од пандемијата.