Македонската А репрезентација вечерва на Националната арена „Тодор Проески“ – Скопје во својот втор натпревар од квалификациите за пласман на Светското првенство убедливо го совлада Лихтенштајн со резултат 5:0 (1:0).

Пандев уште во петтата минута можеше прв да ја затресе противничката мрежа, но неговиот удар немаше доволно сила и истиот беше одбранет. Притисокот на нашите играчи уште од стартот се исплати со првиот погодок, после прекршокот врз Алиоски, Барди кој е препознатлив по неговите одлични удари, тоа го почувствуваше и голманот на Лихтенштајн Бухел кој се обиде да одбрани, но незгодната топка од неговите раце заврши во мрежата за предност од 1:0.

Во 12 минута Барди можеше повторно да се запише во листата на стрелците, од слободен удар овојпат ја погоди пречката. Пет минути подоцна првата закана дојде и од гостите, Фрик сакаше да возврати на ист начин, таа топка незгодно од тревата отскокна, се одби од телото на Димитриевски на петерецот каде што за негова среќа беше Муслиу кој ја отстрани опасноста.

Нашите играчи воглавно ја контролираа играта и топката во текот на средбата, а ривалите ориентирани повеќе на одбраната шансата ја чекаа евентуално од контранапади или некоја случајна грешка на нашите дефанзивци. До новата шанса Македонија чекаше до 37 минута кога Пандев во казнетиот простор убаво со гради ја спушти топката до Радески кој се обиде да постигне, но право во голманот на гостите.

На стартот од второто полувреме беше постигнат и вториот гол (51`), убава акција од левата страна преку Елмас кој правовремено го пронајде Барди, а овој успеа да ја протне топката до Трајковски на кој не му беше тешко да се запише во листата на стрелците (2:0).

Само три минути подоцна играчот на Мајорка го запиша и вториот погодок со еден убав прецизен и силен удар за веќе недостижни 3:0.

Во 58 минута Ангеловски направи тројна замена, теренот го напуштија Барди, Пандев и Ристовски, а настапија Николов, Несторовски и Бејтулаи. Токму Несторовски, фудбалерот на Удинезе веднаш запиша асистенција до Елмас кој го постигна четвртиот гол за нашата селекција (62`). Четири минути подоцна домаќинот направи уште две замени, Трајковски и Алиоски заминаа на клупата, а своја минутажа добија Хасани и Ашковски.

Триумфот беше комплетиран во 82 минута, Марксер направи прекршок во шеснаесетникот врз Николов, а сигурен од белата точка беше Несторовски кој го забележа 10 погодок во националниот дрес.

Следниот трет меч во квалификацискиот циклус, „рисовите“ ќе го имаат на 31 март во Дуизбург против Германија со почеток од 20.45 часот.

Квалификации за СП 2022

Група „Ј“
2. коло, резултати –

Ерменија-Исланд 2:0
Македонија-Лихтенштајн 5:0
Романија-Германија 0:1

Табела: Германија 6 бодови, Ерменија 6, Македонија 3, Романија 3, Исланд 0, Лихтенштајн 0.