Македонската сениорска репрезентација славеше победа над Израел 38:37 (23:19) во вториот натпревар на „Кроација куп“ во Пореч, Хрватска и со тоа ги заврши контролните натпревари пред настапот на Светското првенство 2023 во Полска и Шведска.

Избраниците на селекторот Кирил Лазаров одиграа подобро во првото полувреме во кое имаа предност од 18:11, но продолжението на мечот им донесе враќање на Израелците кои го имаа последниот напад за да стигнат до реми, но не го реализираа.

На уште еден меч со многу голови најефикасен беше Манасков со 11 голови, а Кузмановски постигна шест. Јагуриновски и Георгиевски постигнаа по четири.

Кај Израелците предводени од нашиот поранешен селектор Драган Ѓукиќ, Коен постигна седум гола.

Потсетување дека на првиот дуел на овој меѓународен турнир Македонија загуби од домаќинот Хрватска со 40:34.

Најдобрите македонски ракометари сега се фокурираат целосно на натпреварите на Мундијалот. Во групната фаза во Краков (Полска), на 13, 15 и 17 јануари редоследно се мечевите против Норвешка, Холандија и Аргентина.