Ласко Џуровски, кој е креатор на идејните и ликовно-графичките решенија за изгледот на 200-ката и 2000-ката од книжните пари кои се во циркулација од 2016 година, се огласи на својот фејсбук-профил со нов проект „Дигитализација и изработка на автентичен фонт според ракописот на Кочо Рацин“.

Џуровски претстави фонт „базиран на оригинални документи напишани од Великанот на македонската поезија – Кочо Рацин“.

„Се обидувам максимално да ја задржам автентичноста на неговиот ракопис, се разбира, со мали модификации неопходни за негова употреба во нашава, дигитална сегашност“, посочува тој.

Неговиот фонт има 24 мали кирилични „ракописно-краснописни“ букви и е сè уште во изработка.

„Да го чуваме и надградуваме македонското културно наследство, да го запишеме во вечноста каде што никој не може да го избрише.“

Џуровски се занима со типографија и графички дизајн, работи за светски пазар и е автор на голем број македонски кирилични фонтови со автентични македонски знаци и други фонт фамилии.

Во видеото може да дознаете повеќе за неговата работа: