Со огромно жалење ја пренесуваме веста што утрово длабоко ја потресе македонската јавност. По долга и тешка битка од повредите здобиени во трагедијата во Кочани, во која како последица од страотниот пожар животот го загубија 63 лица, почина Владимир Блажев – Панчо, член на легендарното дуо ДНК, за „Слободен печат“ потврдија од болницата „Аџибадем Систина“, каде што се лекуваше.

Си замина уште една легенда на македонската музика. Тешко е да се најдат зборови кои можат да ја опишат болката и празнината што ја остава неговото прерано заминување. Панчо беше уметник со големо срце, човек кој преку својата музика ги обединуваше генерациите и создаваше песни што ќе живеат засекогаш.

Повеќе од дваесет години, заедно со својот музички брат Андреј, како ДНК, оставија неизбришлив белег на македонската сцена. Нивните песни не беа само хитови – тие беа приказни, емоции и дел од животите на многумина. Со своите стихови и искрен настап, Панчо допираше до душата на публиката и ја освојуваше со секој збор.

Длабоко сочувствуваме со семејството на Панчо, со неговите најблиски, пријатели и со сите што го познаваа и го сакаа. Загубата е огромна, не само за музичката сцена, туку и за цела Македонија.

Од Аџибадем Систина изразија сочувство и истакнаа дека, почитувајќи ја приватноста на пациентите и согласно Законот за заштита на правата на пациентите, не можат да споделуваат дополнителни информации.

Панчо ќе остане запаметен како симбол на талент, добрина и искреност. Неговата музика ќе продолжи да живее како потсетник на човекот кој знаеше како да ја претвори емоцијата во песна.

Сочувство до семејството.