Лукаревска: Потпишан колективен договор меѓу синдикалната организација и УЈП, вработените ќе добијат поголеми плати
Директорката на Управата за јавни приходи, Сања Лукаревска денеска информираше дека е постигнат договор меѓу Синдикатот на Управата за јавни приходи (УЈП) и раководството, но засега нема детали што тој содржи.
Во емисијата „SummerClick“ на ТВ21, Лукаревска изјави дека договорот бил потпишан во петокот, постигнат со посредство на медијаторот Илија Манасиев. Тоа што го бараа вработените е почитување на колективниот договор и зголемување на платите за 30 проценти.
Во петокот беше потпишан колективен договор меѓу синдикалната организација и УЈП и беше добиено позитивно мислење од Министерството за финансии, рече Лукаревска и најави дека вработените ќе добијат зголемување на платите.
Во изминатиот период вработените во УЈП протестираа и најавија генерален штрајк. За помирувач првично беше назначен Лазар Јовевски кој побара иземање затоа што не беше во државата, по што на негово место беше назначен Илија Манасиев.