Играчот на Интер верува дека спаѓа во кругот на најдобрите фудбалери, неговата белгиска репрезентација на Европското првенство в недела ќе игра против Португалија во осминафиналната фаза.

Сигурно дека се очекуваат доста возбудувања на стадионот во Севиља помеѓу Белгијците и Португалците, но многумина веруваат дека тоа ќе биде дуел помеѓу Ромелу Лукаку и Кристијано Роналдо.

Роналдо блеска на Евро 2020 и во моментов е најдобар стрелец со пет погодоци, но јасно е дека ќе има многу тешка задача против Белгија. Пред овој натпревар, Лукаку даде изјава за белгиските медиуми во која зборуваше за Роналдо. Новинарите го прашаа дали ѕвездата на Јувентус беше мотивација за Лукаку во борбата за титулата минатата сезона во Серија А:

– Беше одлично да се освои Скудетото со Интер во една одлична сезона, но мислам дека присуството со Роналдо не ме мотивираше како што мислите затоа што не ни помислував на тоа – рече Лукаку.

На белгискиот репрезентативец му пречи тоа што и натаму не добива пофалби од медиумите и не го дефинираат како врвен напаѓач.

– Кога луѓето зборуваат за Левандовски, Бензема или Кејн, тие велат дека се врвни напаѓачи, но кога станува збор за мене тие велат дека сум во добра форма. Тоа ме мотивира да работам уште понапорно и да напредувам. Искрено, верувам дека сум сега меѓу врвните напаѓачи – вели Лукаку.

Едно од прашањата беше за Лукаку кој дел од играта Роналдо би сакал да го поседува, а тој одговори дека од Португалецот би сакал да ги има вештините за дриблинг и ударите.

28-годишниот напаѓач минатата сезона постигна 30 гола на 44 натпревари за Интер и забележа 10 асистенции. Што се однесува до селекцијата на Белгија, тој е веќе најдобриот стрелец на сите времиња затоа што постигна дури 63 гола на 96 натпревари за сениорскиот тим на оваа земја.