Денеска на програмата се реванш натпреварите од 1/16 финалето во Лига Европа, вкупно тројца Македонци се борат за пласман во следната фаза.

Наполи на нашиот репрезентативец Елиф Елмас од 18.55 часот на својот стадион „Диего Армандо Марадона“ ќе брка негатива, на првиот меч Гранада во Шпанија славеше со 2:0.

Елмас се очекува да добие шанса за настап, тренерот Џенаро Гатузо има проблеми со повредени играчи, а на листата се наоѓаат Деме, Хисај, Лозано, Манолас, Осимхен, Оспина и Петања, а под знак прашалник е и Инсиње.

Нешто поблиску до осминафиналето во ЛЕ е Динамо Загреб на Аријан Адеми и Стефан Ристовски. Од 21.00 часот на стадионот „Максимир“ Хрватите бранат предност од 3:2 стекната во првите 90 минути против Краснодар во Русија.

Од другите мечеви Арсенал на неутралниот терен во Пиреја (Грција) ќе стартува со 1:1 против Бенфика, потоа Милан на „Сан Сиро“ ќе ја пречека Црвена звезда, во Белград средбата заврши со резултат 2:2.

Манчестер јунајтед на „Олд Трафорд“ се очекува само рутински да го одработи возвратниот дуел со Реал Сосиеад, првиот натпревар заврши со висок триумф на „црвените ѓаволи“ од 4:0.

Интересно се очекува да биде и на пресметката во Ајндховен каде што ПСВ ќе се обиде да ја анулира негативата од првиот меч против Олимпијакос во кој Грците славеа со 4:2.