Левандовски ги избра најдобрите напаѓачи во светот, изненадувачки не се вброи меѓу нив
Фудбалерот на Баерн Минхен, Роберт Левандовски, додека се подготвува за продолжување на Бундеслигата и утрешниот дуел со Унион Берлин, доби интересен предизвик од новинарите, да ги издвои најдобрите пет напаѓачи на светот.
– Да ги набројам петте најдобри напаѓави на светот во овој момент. Ова е тешко прашање… Доколку зборуваме за оние класични деветки, тогаш би ги избрал Карим Бензема, Тимо Вернер, Луис Суарез, Серхио Агуеро и Килијам Мбапе – изјави Левандовски, кого фудбалските експерти токму него го сметаат за најдобар класичен напаѓач во светот.
Фудбалерот на Баерн Минхен имаше само пофални зборови за играчот на Борусија Дортмунд, Ерлинг Халанд кој во зимскиот преоден рок дојде во Бундеслигата и на 11 натпревари постигна 12 гола.
– Тој е огромен потенцијал, но за него се уште има време. Не сакам да ставам дополнителен притисок на него со бомбастични изјави. Доколку продолжи да работи напорно, ќе биде уште подобар. Мислам дека за него е најдобро да остане уште некоја сезона во Бундеслигата и да продолжи да се развива, а дури потоа да го направи следниот чекор – вели Левандовски.