Лазаревски од РК Металург направи трансфер во Словенија
Милан Лазаревски, кој во целата своја досегашна кариера беше дел од ракометниот клуб Металург, денеска потпиша 2,5-годишен договор со екипата на Тримо Требње од Словенија.
– Почна да тренира во нашата школа во Автокоманда, а од Металург заминува како афирмиран ракометар. Му посакуваме успех во новата средина – информираа од РК Металург.
Трансферот го потврдија и Словенците на својот клупски сајт, 24-годишниот пивот Лазаревски доаѓа како замина за повредениот Лан Грбиќ.
– Многу сум среќен што доаѓам во голем клуб каков што е Тримо Требње. Се развива еден сериозен и амбициозен проект. Се чувствувам одлично, бев пречекан од моите соиграчи и стручниот штаб. Благодарам за можноста и фокусиран сум на зацртаните цели – рече Лазаревски.
Моментно во најсилниот словенечки шампионат Тримо Требње се наоѓа на второто место со 22 бодови, три помалку зад водечкиот Целје.