Културно наследство: Виртуелно доживување на археолошкиот локалитет Стоби
Виртуелно доживување на археолошкиот локалитет Стоби посетителите ќе ги врати во минатото, а преку социјалните медиуми ќе има можност да се присуствува на виртуелна гладијаторска борба во театарот на Стоби во 2. век од н.е.
Виртуелното доживување е изработено преку проектот „Откривање на римскиот град Стоби – Виртуелно искуство“ со цел да ја зголеми туристичката понуда на Стоби преку обезбедување на нови искуства на локалитетот. Користењето на технологијата во промоција и доближување на културното наследство е можност да се привлечат повеќе посетители, пред сѐ, нова млада публика.
Апликацијата за виртуелна реалност ќе им овозможи на посетителите на Стоби да добијат предно седиште во 3Д реконструираниот театар и на тој начин да ја доживеат гладијаторската борба како дел од публиката во гледалиштето. Целото искуство ќе биде збогатено со автентична атмосфера карактеристична за еден ваков настан, како и со големината и монументалноста на овој империјален објект.
Проектот е поддржан од Регионалниот совет за соработка (Regional Cooperation Council) и финансиран од Европската унија, а го реализираат Центарот за социјални иновации „Блинк 42-21“ од Скопје и Националната установа за управување со археолошкиот локалитет Стоби.
(Текстот е објавен во „Културен печат“ број 45, во печатеното издание на „Слободен печат“ на 22-23 август 2020)