Независниот културен центар КЦ 750 информираше дека во 2020 година реализирале шест онлајн активности. Поради пандемијата на вирусот ковид-19, оваа сезона со арт-фиќото не организирале настани на јавен простор, туку ширеле уметност на алтернативен начин, со онлајн претставување на изложби, инсталации и литературни читања. Своите дела во КЦ 750 ги изложија Тамара Забазноска, Филип Велковски, Будимка Поповска, Васко Марковски, уметничка инсталација подготви Ѓорѓе Јовановиќ, а беше претставена и поезијата на Ива Дамјановски.

Видео за сите настани може да се најде на Јутјуб-каналот на центарот. За да не остане сè само во виртуелниот простор, биле подготвени принтови со материјали од изложбите и читањата и дистрибуирани во поштенски сандачиња по случаен избор во повеќе скопски населби.

КЦ 750 е мал, мобилен културен центар, заеднички проект на Иван Шопов и Владимир Лукаш. Целта на проектот е развивање и поттикнување нови модели на искористување на јавниот простор за културни намени. Проектот е поддржан од Министерството за култура и Град Скопје.

(Текстот е објавен во „Културен печат“ број 63, во новогодишниот број на печатеното издание на „Слободен печат“ на 31 декември 2020 – 3 јануари 2021)