Двајца од тројцата приведени за убиството на матичниот лекар Ацо Трповски добија куќен притвор, информираат од Основното јавно обвинителство Скопје.

-Со оглед на тоа што се уште се преземаат дејствија за обезбедување докази, јавен обвинител од Основното јавно обвинителство Скопје синоќа до судијата на претходна постапка од Основниот кривичен суд Скопје достави предлог за определување мерка краткотраен куќен притвор во траење од 48 часа за две од лицата кои беа задржани во врска со убиството на лекар во скопската населба Железара. Предлогот е прифатен и бараната мерка е определена, стои во соопштението од Скопското обвинителство.

Министерот за внатрешни работи, Панче Тошковски вчера информираше дека е уапсено уште едно лице за убиството на матичниот лекар.