Војник се појави пред воениот суд во Пиреја откако призна дека до смрт избол син на полицаец, чиешто тело беше пронајдено во парк во атинската населба Агиос Димитриос на почетокот на оваа недела, објави „Катимерини“.

Осомничениот има 20 години и во моментов е на служба во грчката морнарица, а беше изведен пред Воениот суд во Пиреја во петокот. Останатите осомничени, 18-годишно момче, опишано како пријател на наводниот сторител, и две 20-годишни девојки, се соочуваат со обвиненија за помош на сторител во извршено кривично дело. Тие беа изведени пред граѓански суд во Атина.

Според полицијата, 27-годишната жртва, за која се известува дека е син на висок полициски службеник, претходно била во врска со една од девојките. По нивното раскинување, девојката започнала врска со 20-годишниот осомничен, што наводно довело до тензии меѓу двете момчиња.

Инспекторите велат дека осомничениот договорил средба со жртвата во паркот Асирмату во Агиос Димитриос, под изговор дека ќе ги решат недоразбирањата. За време на средбата избила расправија, при што осомничениот ја пробол жртвата во градите, нанесувајќи ѝ смртоносни повреди.

Судење за бруталното убиство на штипјанката најдена закопана во двор: Се бара строга казна за Асанов, одбраната тврди — нема докази

Полицијата тврди дека осомничениот побегнал од местото на настанот со автомобил заедно со неговиот 18-годишен пријател, а подоцна се сретнал со двете жени.

Откако веста за убиството се прошири следниот ден, една од жените, придружувана од својот адвокат, отишла во полициска станица за да даде изјава. Таа наводно им кажала на полицајците дека знаела за планираната средба и го молела своето момче да не оди, додавајќи дека тоа подоцна тврдело дека жртвата воопшто не се појавила.

Пријателот на осомничениот, исто така, сам им се предал на властите, додека, пак, главниот осомничен го признал делото вчера вечерта, насочувајќи ја полицијата до локацијата каде што го сокрил ножот со кој го извршил убиството.

Осумнаесетгодишен Македонец осомничен за обид за убиство во Црна Гора