Потребно е надлежните институции да преземат итни мерки за расчистување и отстранување на запаливите материјали и штетниот отпад од поранешната фабрика „Треска“ кој може да го загади воздухот и почвата и воопшто животната средина на граѓаните кои живеат на тој потег. Ова е еден од заклучоците на денешната седница на Кризниот штаб на Град Скопје, со кој раководи градоначалничката Данела Арсовска. Со таа постапка би се отстранила опасноста од загадување и можноста од повторување на пожари.

Градот Скопје ги става на располагање своите капацитети за помош во расчистувањето на штетните материјали, доколку надлежните институции утврдат потреба од истото, а воедно за подобра и навремена подготвеност на службите за интервенција, беше донесен заклучок да се побара информација за база на податоци од Дирекција за заштита и спасување, за мапирање потенцијални ризични места во градот каде постојат цистерни или магацини со запаливи или ризични материјали, со цел брза и навремена интервенција за заштита од можни хаварии и инциденти предизвикани од пожар – информираат од Град Скопје.

Оттаму објаснуваат дека при гаснењето на пожарот, пожарникарите биле изложени на ризик и опасност, како и околните куќи кои ги делел само еден ѕид од пожарот.

На самото место не само што постоеле извесни запаливи материјали во магацините, има и цистерна со обем од 20 илјади литри на нафтени деривати и истата е огромна опасност која ја доведува во прашање безбедноста на граѓаните – тврдат од Градот.

На денешниот состанокот присуствувале и  командантот на Противпожарната бригада на Град Скопје, Звонко Томески, директорите на јавните претпријатија и членови на Кризниот штаб.