Кинезите што ќе го гледаат „Боречки клуб“ на новата платформа „Тенцент видео“ нема да можат да ја видат поентата на култниот филм со Едвард Нортон и Бред Пит, бидејќи крајот е „брутално искасапен“ од цензори.
Од филмот сосема е избришана завршната сцена во која Нараторот (Нортон) го убива своето имагинарно алтер-его Тајлер (Пит) и гледа како експлодираат зградите и се уништува модерната цивилизација, што е главната анархистичка и антикапиталистичка порака на режисерот Дејвид Финчер.
Наместо експлозиите, во цензурираната верзија се гледа порака на црна заднина: „Полицијата брзо го откри целиот план и ги уапси сите криминалци, успешно спречувајќи детонација на бомбите“.

Притоа се објаснува дека Тајлер воопшто не е дел од имагинацијата на Нараторот, туку е испратен во „дом за психолошки третман“ и дека „подоцна е отпуштен“.

– Ова е злосторство – коментирал еден корисник на новопромовираната платформа „Тенцент видео“.

Платформата не објаснува зошто филмот е цензуриран и кој го искасапил крајот.
Жртва на цензорите пред неколку години беше и „Боемска рапсодија“, од кој во Кина биле исфрлени сцени што говорат за сексуалноста на главниот јунак Фреди Меркјури, а која всушност е главната поента на биографскиот филм.
Поради строгата државна цензура на Пекинг холивудските студија често пати самите прилагодуваат верзии на филмовите за да се прикажуваат на кинескиот пазар.
Во ерата на претседателот Сји Ѓинпинг цензорите имаат задача да го заштитат општеството од „нездрави“ влијанија од филмови, телевизиски серии и видео-игри. Администрацијата за кибернетски простор токму денеска објави едномесечна кампања на „чистење на мрежата“ за да се создаде „цивилизирана и здрава атмосфера за време на новогодишните празници“.