Ги дознавме првите патници во четвртфиналето на Конференциската лига, тие се Фенербахче, Фиорентина и ПАОК.

Иако на реваншот од осминафиналната фаза фудбалерите на Фенербахче загубија дома со 1:0 од Ројал Унион, сепак Турците одат понатаму благодарение на победата од 3:1 на првиот натпревар одигран во Белгија.

Во Италија екипите на Фиорентина и Макаби Хаифа одиграа 1:1. Барак донесе водство за „виолетовите“ во 59 минута, а Израелците израмнија во 88 минута преку Халаили. Италијанците се четвртфиналисти откако на првиот дуел триумфираа со резултат 4:3.

На првиот дуел одигран во Хрватска, Динамо Загреб славеше со 2:0 против ПАОК.

Грците пред своите навивачи во Солун успеаја да ја анулираат негативата и слават со убедливи 5:1. Целиот меч за „модрите“ го одигра поранешниот македонски репрезентативец Стефан Ристовски.

По првото полувреме водеше ПАОК со 3:0, во 27 минута предност донесе Баба, во 33 минута автогол си постигна Сучиќ, а за 3:0 стрелаше Томас.

Динамо намали на стартот од вториот дел преку Хоџа (49`), потоа Кулиеракис постигна гол во 73 минута за 4:1, а за конечниот епилог го постави Живковиќ од пенал во 88 минута.