Камерниот оркестар Скопски солисти годинава слави 20 години од основањето и во чест на јубилејот го најави концертот „Нашите од Европа“, што ќе се одржи на 14 декември во камерната сала на Филхармонија. Како гости на концертот ќе настапат кларинетистот Благој Ламњов, кој е родум од Велес, а живее и работи во Малме, Шведска, и диригентот Виктор Митревски, кој потекнува од музичко семејство од Скопје, а веќе неколку години со особен успех работи во Виена, Австрија.

На програмата се дела што премиерно ќе бидат изведени во Македонија од композиторите Комитас, Штамитц и Сибелиус, додека Ламњов за првпат пред македонската публика ќе ја отсвири композицијата „Сербез Донка“, која се наоѓа на неговиот деби компакт-диск „Носталгична љубов“. Уметнички раководител на камерниот ансамбл Скопски солисти е обоистот Васил Атанасов.

(Текстот е објавен во „Културен печат“ број 60, во печатеното издание на „Слободен печат“ на 12-13 декември 2020)