Писателот на литература за деца, Васил Мукаетов, во еден здив објави три нови збирки. Станува збор за книгите „Од згода до згода, заграб бистра вода“ (умнозборки, пословици и поговорки), „Што е, што не е?“ (стихувани гатанки) и „Ај погоди!“ (песни дополнувалки).

Инспирацијата за првата книга со умнозборки, пословици и поговорки Мукаетов ја црпи од нашиот најплоден собирач и запишувач на фолклорот, Марко К. Цепенков, кој собрал повеќе од 5.000 народни пословици и поговорки. Писателот Мукаетов дел од поговорките ги пренесува како песни со поука за децата, а целта е преку селектираните поговорки да се бори со заборавот на усно пренесуваното фолклорно наследство. Книгата со стихувани гатанки содржи точно 99 на број, а сите се напишани со намера децата да се ангажираат со допишување на зборовите што недостигаат. Доколку децата не можат сами да го најдат решението, тогаш напомош треба да им пријдат нивните родители. Третата книга содржи 95 песни-дополнувалки, со што децата на некој начин стануваат коавтори на песните што ќе успеат да ги допишат.

Писателот Васил Мукаетов со своите читатели другарува уште од 60-тите години на минатиот век преку страниците на списанијата „Другарче“, „Колибри“, „Развигор“, а застапен е и во повеќе учебници по македонски јазик и литература за основното образование. Член е на Друштвото на писателите на Македонија, во 2017 година ја доби наградата за најдобра книга за деца „Ванчо Николески“ на ДПМ за стихозбирката „Скокни прескокни“. Досега има објавено 20-ина книги за деца, а новите три книги се издадени од „Либи“, дел од „Арс ламина – публикации“.

(Текстот е објавен во „Културен печат“ број 60, во печатеното издание на „Слободен печат“ на 12-13 декември 2020)