КНИГА за деца: „Дрвото“ од Бардур Оскарсон
Издавачот „ПНВ Публикации“ ја објави најнаградуваната илустрирана книга за деца „Дрвото“ од авторот Бардур Оскарсон. Книгата од англиски јазик ја преведе Јулијана Величковска.
„Дрвото“ е книга за стравот од непознатото, за немирот во наводната едноличност на секојдневието, за внатрешните битки и за нијансите на пријателството.
Бардур Оскарсон (1970) е автор за деца и илустратор од Фарските Острови. Автор е на седум свои книги, но и илустратор на многу други книги и книжевни списанија за деца. Добитник е на повеќе награди за литература за деца, како и награди за креативна литература.
Во „Дрвото“ Оскарсон раскажува за двајца пријатели, Хилберт и Боб. Приказната е илустрирана со карактеристичните минималистички, чувствителни потези на Оскарсон.
Речиси монохроматските површини овозможуваат простор за медитација и се фокусираат на експресивниот говор на телото на двајцата пријатели за време на нивната необична средба среде сивото еднообразие на секојдневието, каде што небото е последната граница, а дрвото веќе изгледа подалечно од кога и да е.
(Текстот е објавен во „Културен печат“ број 22, во печатеното издание на „Слободен печат“ на 14-15 март 2020)