Ќе поскапат ли кременадлите и шницлите?
Агенцијата за храна и ветеринарство (АХВ) го чека одговорот од Европската Комисија (ЕК) и Светската организација за здравствена заштита на животните (ОИЕ), со кој ќе добиеме статус на земја слободна од болеста класична свинска чума, а тоа ќе ги отвори вратите за извоз на живи свињи, свинско месо и македонски производи од свинско месо на европскиот пазар. Лани на 1 октомври, една година по прекинот на превентивната вакцинација против оваа болест, АХВ го достави Досието до ЕК и ОИЕ, со што и официјално аплицираше за дозвола за слободен извоз. Во ЕУ, класичната свинска чума е искоренета, а превентивната вакцинација е забранета како мерка.
-Во досието детално е наведена состојбата со болеста во земјава, постоечките контролни системи и поставеноста на ветеринарната служба, надзорот кој се спроведува од кога е престаната вакцинацијата, како и другите податоци релевантни за добивање на статусот – велат од АХВ за „Слободен печат“.
Првиот дозволен извоз на македонско свинско месо на европските пазари ќе биде одлична вест за домашните фармери, кои со години произведуваат и во целост ги намируваат потребите на домашните потрошувачи. Но, тоа од друга страна, може да предизвика и недостиг од овој месо во домашните медсарници, предупредуваат производителите.
-Ако добиеме можност за извоз на пазарите во ЕУ, може да се појави дефицит и повисоки цени. Пазарот во Македонија е мал, но нашите фарми се можеби на повисоко техничко и биосигурносно ниво од европските, па затоа ќе нудиме екстра квалитет на пребирливите европски купувачи – вели за „Слободен печат“, Гоце Трајчев, управител на МИК Свети Николе.
Минатата година во кланичните капацитети во земјава заклани се 220.038 товеници (свињи и прасиња). Споредбено со изминатите години, оваа сточарска гранка бележи годишен раст на производството на товеници од 10-15 проценти- информираат од АХВ.