Капетан на туристички брод трагично го загубил животот вчера доцна попладне во Скадарското Езеро во Албанија, за време на херојски чин при спасување на двајца туристи, јавија албанските медиуми.

Капетанот на бродот во сопственост на општина Скадар, 51-годишниот Арбен Аламани, се удавил при спасување двајца туристи кои паднале во езерската вода и почнале да се дават. Туристите се спасени и се во добра здравствена состојба, објавија медиумите.

Потрагата по телото на Аламани продолжи и денеска. Истражниот тим продолжува да работи на целосно расветлување на околностите на инцидентот.

-Општина Скадар загуби еден од своите најпосветени луѓе. Чин на хуманост, но за жал со тажен крај. Арбен секогаш беше во служба на посетителите и туристите, придонесувајќи со страст и посветеност до последниот момент од својот живот, стои меѓу другото во објавата на општина Скадар.