Канаѓанец побарал од судија да ја запре евтаназијата на неговата 27-годишна ќерка, тврдејќи дека таа нема капацитет да даде целосна согласност за постапката. 27-годишната од Алберта, позната само по иницијалите М.В., на 1 февруари требало да биде евтаназирана откако го добила потребното одобрение од двајца лекари.

Нејзиниот татко В.В. побарал налог, тврдејќи дека неговата ќерка има недијагностицирана ментална болест што ја спречува целосно да се согласи со постапката. Канадските закони за медицинска помош при умирање, донесени по одлука на Врховниот суд во 2015 година, првично дозволуваа само смртно болните да се квалификуваат за постапката.

Но, во 2019 година, судија во Квебек пресуди дека ограничувањето на пристапот до процесот е неуставно, принудувајќи ги федералните пратеници да ги изменат и прошират постоечките закони. Возрасните сега можат да добијат одобрение за асистирана смрт доколку двајца лекари потврдат дека имаат неповратна физичка состојба што предизвикува огромно страдање што не може да се ублажи.

Во моментов, луѓето кои страдаат исклучиво од хронични ментални болести се исклучени од пристапот до медицински потпомогната смрт. Доколку пациентите не сакаат нивното семејство да биде вклучено во одлуката, членовите на семејството може да бидат исклучени од проценките. 83-годишен маж бил евтаназиран во 2020 година, откако неговата сопруга не успеала да го убеди судот да ја прекине постапката.

27-годишната девојка, која живее со своите родители, вели дека семејството нема правна основа да го оспори нејзиното право на пристап до асистирана умирање. Нејзиниот адвокат се повика на заштитеното право на медицинска автономија при смртните одлуки, пишува Гардијан.

„В.В. е изложен на ризик да ја загуби ќерката и иако тоа е тажно, тоа не му дава право да ја одржува во живот против нејзината желба“, изјави адвокатот Остин Паладо пред судот.

Тој повтори дека канадскиот парламент со креирање на нови закони ги исклучи судиите од одлучувањето, поставувајќи ги лекарите како единствени овластени проценувачи.

М.В. првпат аплицирала за лекарска асистирана смрт во 2021 година. Не било откриено на која основа аплицирала во тоа време, но тоа било одобрено од еден лекар, а потоа одбиено од друг. Истото се повторило и во вториот обид во 2023 година, но од трет лекар било побарано да го провери барањето, по што тој го одобрил.

„Верувам дека М.В. страда од ментални здравствени проблеми, кои до денес не се дијагностицирани и лекувани, и кои ја поддржуваат нејзината желба да пристапи до медицински потпомогната смрт. Сепак, верувам дека нејзините проблеми со менталното здравје влијаат на нејзината способност да донесува одлуки за постапката“, вели таткото во изјавата доставена до судот.

Тој верува дека одлуката на неговата ќерка „може да биде несоодветно под влијание на други луѓе“. Тој поднел извештај од 2021 година во кој лекар од клиника за неврологија тврди дека М.В. е „нормална“ и ја упатува назад кај нејзиниот матичен лекар.