Меѓународните реакции на договорот меѓу САД и Иран за двонеделно примирје почнуваат постепено да пристигнуваат, објави „Си-ен-ен“.

Министерството за надворешни работи на Ирак соопшти дека „го вреднува овој развој како чекор што може да придонесе за намалување на тензиите, зголемување на можностите за деескалација и зајакнување на безбедноста и стабилноста во регионот“.

Европски лидери, меѓу кои германскиот канцелар Фридрих Мерц и британскиот премиер Кир Стармер, го поздравија договорот за примирје.

– Заедно со нашите партнери мора да направиме сè што можеме за да го поддржиме и одржиме ова примирје, да го претвориме во траен договор и повторно да го отвориме Ормускиот Теснец – изјави Стармер.

Оман, кој беше клучен посредник, соопшти дека ја поздравува објавата за примирјето и ја пофалува улогата на Пакистан во посредувањето, според соопштение од неговото министерство за надворешни работи.

Иран и Америка договорија двонеделно примирје, се отвора Ормускиот Теснец

Австралискиот премиер Ентони Албанезе изјави дека оваа најава е „позитивна вест“, велејќи дека се надева оти „ќе доведе до трајна деескалација и крај на конфликтот“. Албанезе исто така ја критикуваше претходната реторика на Трамп, велејќи дека „можноста за штета врз цивилната инфраструктура во Иран беше навистина извонредна изјава“.

Египет го оцени примирјето како „позитивен чекор кон деескалација и ограничување на регионалните тензии“.

– Најважно сега е ситуацијата навистина да се деескалира, вклучително и да се обезбеди безбеден премин низ Ормускиот Теснец – рече главниот секретар на јапонскиот кабинет, Минору Кихара.

Генералниот секретар на Обединетите нации, Антонио Гутереш, ги повика „сите страни да ги исполнат своите обврски“ и „да се придржуваат до условите“ од договорот, според соопштение од неговиот портпарол.

Неколку часа откако Трамп го објави прекинот на огнот, израелскиот премиер Бенјамин Нетанјаху изјави: „Израел ја поддржува одлуката на претседателот Трамп да ги суспендира ударите врз Иран за две недели, под услов Иран веднаш да ги отвори теснеците и да ги запре сите напади врз САД, Израел и земјите во регионот“.

Во соопштението се додава дека „прекинот на огнот не го вклучува Либан“, каде што Израел има копнени сили.

Не е јасно колку Нетанјаху бил вклучен во одлучувањето на Трамп.