Чеченскиот лидер Рамзан Кадиров јавно ги осуди трилатералните мировни преговори меѓу Русија, Украина и Соединетите Американски Држави. Неговото појавување во Москва, каде што даде изјави за руските државни медиуми, се толкува и како обид да ги демантира гласините за неговото нарушено здравје, пишува Kyiv Post.

Говорејќи од салата на Кремљ на 29 јануари, Кадиров зазеде цврст став против какво било дипломатско решение за сеопфатната инвазија.

„Верувам дека оваа војна мора да се приведе кон крај. Преговори, по сè што е направено… Јас сум против преговори“, изјави Кадиров.

Двоен мотив на Кадиров

Кадиров се појави во Москва како дел од руската делегација која го пречека претседателот на Обединетите Арапски Емирати, Мохамед бин Зајед Ал Нахјан.

Аналитичарите неговото присуство го толкуваат како потег со двојна цел: од една страна, демонстрација на неговата континуирана важност за Владимир Путин, а од друга, обид да ги побие гласините за неговата лоша здравствена состојба.

Преговори во чувствителен момент

Изјавите на чеченскиот лидер доаѓаат во чувствителен момент за руската дипломатија. Портпаролот на Кремљ, Дмитриј Песков, потврди дека третата рунда преговори на високо ниво е закажана за 1 февруари во Абу Даби.

Дипломатските напори, кои се интензивираа по втората рунда одржана на 24 јануари, наводно забележале „продуктивен“ напредок на некои полиња.

Сепак, „територијалното прашање“ – инсистирањето на Украина на обновување на своите граници од 1991 година наспроти руските нелегални окупации – и натаму останува главната пречка.

Кадиров го унапреди синот: 20-годишниот Ахмат ќе биде вицепремиер и министер за спорт на Чеченија