Директорката на Клиниката за Гинекологија и Акушерство Викторија Јовановска на денешната прес-конференција изјави дека 22-годишната трудница која почина вчера од ковид-19 одбивала да биде хоспитализирана иако и биле објаснети ризиците за неа и бебето.

„22-годишната трудница беше донесена на Клиниката на 23-ти минатиот месец по трет пат, односно на 22-ри ноќта била донесена два пати, но одбивала да биде хоспитализирана иако и било објаснето и на неа, но и на семејството дека се става во ризик себеси и бебето. Меѓутоа пациентката одбила хоспитализација, примила инфузија, се потпишала и си заминала“, вели Јовановска.

Таа повторно била вратена на клиниката околу 23 часот, меѓутоа одбила да остане бидејќи требала да биде во делот кај ковид-позитивните пациентки, а таа имала негативен тест.

„Лабораторијата и клиниката укажуваа на тоа дека таа е ковид позитивна. Тие кои се пациентки со симптоми ги третираме како суспектни и ги ставаме во делот на ковид, но не кај позитивните туку со суспектните пациентки, меѓутоа пациентката повторно одбила, а кога се вратила на 23 утрото веќе била со мртов плод и со многу влошена лабораторија“, додаде Јовановска.

Директорката објаасни дека пациентката веднаш била префрлена во шок соба, каде почнало породување. Пациентката била породена следниот ден со царски рез, меѓутоа со мртов плод.

Инаку ова и била прва бременост на пациентката, која имала и дијабет.