Петнаесет лица се повредени денеска откако маж влегол во фабрика во префектурата Шизуока во централна Јапонија и нападнал работници со нож, додека други ги испрскал со непозната течност, јавија локалните медиуми, пренесува Синхуа.

Околу 16:30 часот по локално време е примен итен повик во кој се известува дека неколку лица се избодени со нож во фабрика за гума „Јокохама“ во градот Мишима, префектурата Шизуока, и дека течноста е испрскана во објектот, објави јавниот радиодифузен сервис НХК, повикувајќи се на локалната полиција и противпожарните власти.

Според противпожарната служба, 15 лица се повредени и моментално примаат лекарска помош. Сите се во свесна состојба.

Полицијата уапси 38-годишен жител на градот Мишима, за кој се верува дека е поврзан со фабриката, на местото на настанот под сомнение за обид за убиство.

Според полицијата, осомничениот наводно носел нешто што изгледало како гас-маска во времето на нападот.

Властите моментално ги истражуваат деталите за инцидентот.

Насилните злосторства се релативно ретки во Јапонија, која има ниска стапка на убиства и едни од најстрогите закони за оружје во светот.

Сепак, има повремени напади со нож, па дури и пукања, вклучувајќи го и атентатот врз поранешниот премиер Шинзо Абе во 2022 година.

Јапонец беше осуден на смрт во октомври за пукање и напад со нож во кој загинаа четири лица, вклучувајќи двајца полицајци, во 2023 година.

43-годишен маж беше обвинет и за обид за убиство во мај поради напад со нож на метро станицата Тода-мае во Токио.