Кабинетот на израелскиот премиер Бенјамин Нетанјаху објави дека „составот на Извршниот комитет за Газа, кој е подреден на Мировниот комитет, не е координиран со Израел и е во спротивност со неговата политика“.

Станува збор за ретко јавно несогласување меѓу Израел и администрацијата на американскиот претседател Доналд Трамп, објавува „Тајмс оф Израел“.

Белата куќа назначи и Мировен комитет и Извршен комитет за Газа, во кој се вклучени личности како што е турскиот министер за надворешни работи, што очигледно е една од причините за незадоволството во Кабинетот на израелскиот премиер, според „Тајмс оф Израел“.

Белата куќа: Рубио, Блер, Кушнер меѓу членовите на Комитетот за мир на Трамп

Во соопштението од кабинетот на Нетанјаху се вели дека израелскиот премиер му наложил на министерот за надворешни работи Гидеон Саар да го покрене прашањето со својот американски колега Марк Рубио.

Досега, Саар не бил вклучен во справувањето со израелско-американските односи, кои се воделе преку канцеларијата на Нетанјаху и преку неговите врвни советници.

Извршниот одбор за Газа има 11 члена и е задолжен за поддршка на канцеларијата на високиот претставник на Обединетите нации за Газа, Николај Младенов, и палестинското технократско тело.

Според „Ројтерс“, во овој комитет членуваат турскиот министер за надворешни работи Хакан Фидан, специјалниот координатор на ОН за мировниот процес на Блискиот Исток, Сигрид Каг, министерката за меѓународна соработка на Обединетите Арапски Емирати, Рим Ал Хашеми, и израелско-кипарскиот милијардер Јакир Габај.

Трамп формира тим за обнова на Газа по војната, Милеј и Карни поканети да се приклучат