Тетовскиот фотограф Зоран Андонов на 18 март 2026 година ќе се претстави со изложба на документарна фотографија со наслов „Водици 2002-2026“.

Фотографирајќи го празникот Водици во изминативе 24 години тој има направено преку 3.000 фотографии, а на изложбата ќе претстави 162 од нив. Изложбата ќе биде отворена во Музеј на тетовскиот крај (Дом АРМ) во среда, во 19 часот.

– За секоја година одбрав по шест фотографии правејќи на тој начин по една мала приказна од најзначајните моменти кои го одбележале ова чествување. Акцентот го ставив на документарната фотографија, која е тесно поврзана со мојата професија новинар, но секако се обидов да го запазам и уметничкиот аспект на овие фотографии. Празникот Водици навистина е благородна тема за фотографирање, па така неколку од изложените фотографии беа примени на изложби организирани во Македонија, но и во странство – вели Зоран Андонов.

Почнал во 2002 година, откако во претходната година го набавил својот прв дигитален фотоапарат.

– Почнав редовно да го следам чествувањето на Водици (ги имам пропуштено само 2003, 2016, 2021 и 2025 година, и тоа поради објективни причини). Од 2018 година почнав да го следам положувањето на крстот и во Црквата Св. Богородица во Горно маало, а на оваа изложба имам фотографии и од Стенче, Волковија и манастирот Св. Јован Бигорски, односно положувањето на крстот во реките Вардар и Радика – се потсетува Андонов.

Тој вели дека ако зборуваме со речникот на фотографијата, тогаш Водици сигурно е еден од најфотогеничните верски празници.

– Сета таа процесија, почнувајќи од службата во црквата, насобраниот народ, осветувањето на водата, чин кој најчесто го извршува владиката, па оние млади, а некогаш и постари, момчиња кои бестрашно и со атрактивни скокови влегуваат во плиткиот црковен базен со ладна вода, борбата меѓу нив кој ќе го фати крстот, заедничката радост и честитањето на победникот и на крајот големата желба на насобраниот народ да наполни барем едно шишенце од осветената вода, сето ова дава прекрасна можност да се направи не само документарна фотографија, туку и фотографија која ќе има и уметнички предиспозиции – потенцира тетовскиот новинар и фотограф.

Зоран Андонов е роден во 1959 година. По професија е новинар со 37-годишно работно искуство во новинарството. Како новинар известувал за националните медиуми: МТВ, Канал 5, и во пишаните медиуми: Вест, Дневник и Утрински весник како новинар и фоторепортер. Сега работи како новинар-фоторепортер за електронската редакција „Сакам да кажам“. Како новинар дописник од Тетово известувал за бројни настани со разна тематика, а неговите фотографии, освен во домашните пишани и електронски медиуми, повеќе пати биле објавувани и од странски новински агенции.

Со фотографија се занимава повеќе од 40 години. Од 1993 година член е на Фото сојузот на Македонија, а од 2018 година член на Извршниот одбор на ФСМ. Во 2012 година го добива звањето „Фотограф права класа“ на Фото сојузот на Македонија. Досега има реализирано 4 самостојни изложби на фотографија, а учествувал и на голем број републички и меѓународни изложби на фотографија од каде има освојувано повеќе награди и признанија. Член е на Фото групата „Чкрап!“ од Тетово.

Коавтор е на делото „Лексикон на странски сликари кои престојувале во Македонија во периодот 1850-1950 година“, на авторот Влатко Милошевски, издадено во 2022 година.