Првиот носител на АТП ранг-листата обезбеди пласман во финалето на Мастерсот во Париз и со тоа си го обезбеди првото место на крајот на годината. Ѓоковиќ по седми пат ќе ја заврши годината како најдобар тенисер и ќе го надмине рекордот на неговиот идол Пит Сампрас кој шест пати ја завршуваше годината како најдобар светски тенисер.

Ѓоковиќ во полуфиналето во Париз во маратонски меч го совлада Полјакот Хуберт Хуркач со 3:6,6:0,7:6 и во финалето ќе игра со подобриот од вториот полуфинален дуел Александер Зверев – Данил Медведев.

Првиот сет го одлучи една брејк топка која ја имаше Хуркач на сервис на Ѓоковиќ, во осмиот гем Полјакот успеа да направи брејк и потоа да го освои својот сервис и да поведе со 0:1 во сетови.

Одговорот на Ѓоковиќ во вториот сет беше брутален, го остави на нула својот противник, а притоа на свој сервис загуби само четири поени.

Во третиот сет очекувано се водеше голема борба, уште во првиот гем Хуркач имаше брејк топка но Новак успеа да ја спаси и да поведе со 1:0 во гемови. Идентична ситуација беше видена во вториот сет, но овој пат се спаси Хуркач, но тоа не му успеа во четвртиот гем кога Ѓоковиќ сепак успеа да направи брејк и да поведе со 3:1. Десеттиот тенисер на АТП ранг-листата не се предаде, во седмиот гем успеа да направи брејк и да ја врати неизвесноста во мечот.

Откако Ѓоковиќ во десеттиот гем не искористи меч топка,  двајцата тенисери беа сигурни на свој сервис и натпреварот го однесоа во тај-брејкот.

Во него, првиот удар го зададе Хуркач кој поведе со 2:3, но Ѓоковиќ веднаш возврати и израмни на 3:3, а потоа успеа да освои уште еден поен на сервис на противникот што значеше триумф и пласман во финалето како и обезбедување на првото место на АТП ранг листата до крајот на годината.