Андријана Петрушовска (23) од Скопје лани беше меѓу десетте финалистки во регионалното музичко шоу „Ѕвездите на Гранд“. Иако не победи, таа остави впечаток на публиката – не само со настапите, туку и со атрактивниот изглед.

И оваа сезона Андријана повторно е дел од познатото шоу, кое ѝ донесе не само популарност, туку и настапи низ градовите во Македонија, а на пат е да ја сними и својата прва песна. Додека „Гранд“ паузира, Андријана времето го минува во Скопје. Пред повторно да замине во Белград, каде што очекува финале, па и победа, со неа зборувавме за популарноста што ѝ ја донесе регионалното шоу.

– Имам повисоко очекување за себе и за својот резултат во овој циклус и мислам дека ќе стигнам на едно повисоко ниво од мојот минатогодишен настап во „Ѕвездите на Гранд“. Сега кога имам поголемо искуство е полесно. Иако, тремата пред настап постои секогаш, ќе бидам искрена и ќе кажам дека овој пат се чувствувам посамоуверено во своите вокални способности и на натпреварот, а и кога ќе се изгаснат камерите, не ја губам самодовербата – открива Андријана во разговорот за „Слободен печат“, на прашањето какви се очекувањата овој пат и дали можеби се надева на победа.

Скопје – Белград е нејзината постојана реализација. Особено ја радува кога добива покани да пее на домашната сцена, а се надева дека еден ден ќе биде дел и од српската сцена.

– Често сум во Белград поради своите ангажмани во „Гранд“ и секако дека ми е голема желба да настапувам на таа сцена. Но, засега моите настапи се тука, во Македонија, а имам и по некој настап во европските градови – вели Петрушовска.

Андријана откри дека српската фолк-ѕвезда Светлана Цеца Ражнатовиќ видела голем потенцијал во неа уште лани, па ѝ давала голема поддршка во она што го работи.

– Точно така, Цеца ми даде голема поддршка и одлични коментари, но по некој неочекуван пресврт на настаните, сега сум во тимот на Мили. Како и да е, со самото тоа што лани бев во десетте финалисти е за мене голем успех и токму тој успех ми овозможи место на нашата сцена, добив поддршка, имам голем број настапи и ангажмани низ цела Македонија – раскажува ѕвездата на „Гранд“.

Андријана постојано настапува во ноќните клубови низ градовите во Македонија. Вели дека репертоарот секогаш зависи од публика и најчесто пее сè она што нашата сцена го диктира, па така, понекогаш пее забавна музика, понекогаш турбо-фолк.

За среќа, открива таа, досега никогаш не ѝ се случила непријатна ситуација за време на настап, или, пак, невкусно однесување на некој од публиката.

Не е тајна дека на социјалните мрежи споделува провокативни фотографии, па ја прашавме, колку и како тоа влијае врз нејзиниот приватен и љубовен живот.

– Ниту грдите ниту лошите коментари не ме погодуваат, затоа што мислењето на другите никогаш не ми било важно. И воопшто не ме интересира кој што зборува. Мислењето на другите никогаш не ми било важно и, секако, никогаш нема да биде. Секој има право на свое мислење – вели младата пејачка и додава дека тоа никогаш не влијаело ниту на нејзиниот љубовен живот.

– Јас сум среќна и насмеана во љубовта и тоа е најважно. Не ме интересира кој што зборува за мене – додава пејачката.

Покрај „Ѕвездите на Гранд“, Петрушовска најави и прва песна со која ќе ѝ се престави на публиката.

ВИДЕО | На чекор до финале: Андријана Петрушовска „растури“ во „Ѕвездите на Гранд“: Цеца и Шерифовиќ воодушевени