Индустриското производство во еврозоната се намали за 1,2 проценти во август во споредба со претходниот месец, објави денес Евростат. Службата за статистика на ЕУ истакнува дека ова е значително полошо од растот од 0,5 проценти во јули, но малку подобро од пазарните очекувања за пад од 1,6 проценти. Производството на капитални добра беше главниот фактор зад овој исход, бидејќи падна за 2,2 проценти, откако во јули порасна за 1,7 проценти.

Дополнително, производството на трајни производи за широка потрошувачка, енергија и меѓупроизводи, исто така, се намали. Производството на нетрајни производи за широка потрошувачка речиси стагнираше на околу 0,1 процент, во споредба со јулските 1,8 проценти. Меѓу најголемите економии на Еврозоната, производството најмногу падна во Германија – за 5,2 проценти, наспроти растот од јулските 1,5 проценти.

Потоа следува Италија со пад од 2,4 проценти, во споредба со зголемување од 0,4 проценти пред еден месец, по што следуваат Франција со пад од 0,7 проценти (наспроти минус 0,1) и Шпанија, која имаше пад на производството од 0,1 процент, во споредба со падот од јулските 0,5 проценти. Од друга страна, Холандија забележа раст од 2,3 проценти, по падот од 1,3 проценти во претходниот месец.