Порите се природен дел од кожата – преку нив се лачат себумот и потта, а токму тие процеси ја одржуваат кожата заштитена и хидрирана. Сепак, кога порите се изразено проширени, можат значително да влијаат на изгледот на лицето. Иако не станува збор за здравствен проблем, туку пред сè за естетско прашање, кај многумина тоа влијае врз самодовербата, пишува „Е-клиника“.

Проширените пори најчесто се забележуваат на носот, челото и брадата. Тие не се исклучиво поврзани со акни и митесери, туку зависат и од типот на кожа. Лицата со мрсна кожа почесто се соочуваат со овој проблем, а генетиката игра значајна улога – проширените пори често се појавуваат во рамки на исто семејство.

Зошто се појавуваат проширени пори?

Освен наследниот фактор, појавата на проширени пори е поврзана и со хормонални промени – во пубертет, бременост или менопауза. Зголеменото лачење на себум ги прави порите повидливи.

Стареењето на кожата е уште една причина. Со текот на времето, кожата губи колаген и еластичност, па порите стануваат поизразени. Колагенот е протеин што не само што ја одржува кожата цврста, туку е присутен и во коските, мускулите, тетивите и лигаментите. Намаленото производство на колаген води до појава на брчки, опуштање на кожата, намалена густина на коските и слабеење на мускулниот тонус.

Сонце и неправилна нега

Прекумерното изложување на сонце и користењето солариум го оштетуваат колагенот и еластинот, што придонесува за стареење на кожата и проширување на порите.

Неправилната нега – нередовно чистење или употреба на несоодветни козметички производи – исто така може да ја влоши состојбата. Тешките, мрсни препарати доведуваат до насобирање мртви клетки и дополнително затнување и проширување на порите.

Како да ги намалиме проширените пори?

Првиот чекор е правилна и редовна нега. Лицето треба да се чисти со благи средства што не ја сушат кожата. Шминката мора темелно да се отстрани пред спиење.

Отстранувањето на мртвите клетки со соодветен пилинг е важно, по можност во консултација со дерматолог. Хемиските пилинзи со алфа-хидрокси или бета-хидрокси киселини ефикасно ги чистат порите. Препаратите со ретиноиди го поттикнуваат обновувањето на клетките и создавањето колаген, но треба да се користат внимателно и во комбинација со заштитна крема со фактор.

Дерматолозите препорачуваат лесни хидратантни креми што го регулираат лачењето себум и го намалуваат ризикот од затнување на порите. Во одредени случаи може да се применат и ласерски третмани.

Домашна маска од белка од јајце

Кај мрсна или мешана кожа, каде што порите најмногу се забележуваат во Т-зоната, може да помогне и едноставна домашна маска. Една белка од јајце се мате додека не стане цврста, се нанесува на лицето и се остава околу 30 минути. Потоа се плакне со млака вода. Оваа маска може привремено да ги стегне порите и да ѝ даде на кожата поцврст и посвеж изглед.

Иако проширените пори не можат целосно да исчезнат, со правилна нега и соодветни третмани нивната видливост може значително да се намали.