Камерунскиот играч за врска Алекс Сонг одлучи да продолжи со активното играње на професионален фудбал на африканскиот континент, поточно во Џибути.

Сонг има 33 години и во март стана слободен агент, откако договорот со швајцарската екипа Сион беше прекинат поради пандемијата на коронавирус. Разгледуваше неколку опции и на крајот после осум месеци пауза одлучи да направи еден изненадувачки потег.

Информациите велат дека Сонг потпиша договор на една година со опција за продолжување на соработката на уште една година.

Фудбалерот од средниот ред во 2012 година, по шест сезони поминати во дресот на Арсенал, направи трансфер во Барселона за 15 милиони фунти и за чиј клуб одигра 39 натпревари.

Со лондонските „топчии“ беше финалист во Лига купот, а со каталонскиот гигант по еднаш ги освои Ла Лига и шпанскиот Суперкуп.  За најдобрата селекција на Камерун запиша 49 настапи.