Претепаниот секретар на бугарскиот културен клуб „Цар Борис Трети“ од Охрид, Христијан Пендиков ќе биде денеска опериран на ВМА во Софија.

23-годишното момче во четвртокот беше претепано од страна на тројца охриѓани и притоа се здоби со тешки повреди: пукнат вратен пршлен, скршена вилица и повреди на главата.Во петокот со бугарски владин авион „Фалкон“ беше пренесен на Воено-медицинската академија во Софија.

Таму лекарите констатираа дека состојбата му е средно тешка, но не е во животна опасност.

Вчера Пендиков во болница го посетија шефовите на македонската и бугарската дипломатија Османи и Милков, откако претепувањето прерасна во дипломатски скандал, зошто официјална Софија тврдеше дека нападот се случил поради тоа што Пендиков се декларирал како Бугарин и ги нападна македонските власти дека во континуитет не ги процесуираат случаите кога беа вандализирани бугарските културни клубови „Иван Михајлов“ во Битола и охридскиот „Цар Борис Трети“.

Нападот врз Пендиков се случи неколку дена по бугарските провокации среде Скопје на панихидата на Мара Бунева изречени од европратеникот Ангел Џамбаски и пратеникот и лидер на Преродба Костадин Костадинов.

Вчера министерот Бујар Османи беше дециден дека било кој провокатор, дали е тоа политичар од Бугарија или од Северна Македонија, дали е тоа насилникот од Охрид или од било каде, нема да се дозволи тие да ја диктираат агендата на македонско-бугарските односи. Бугарската заедница е и ќе биде почитувана заедница во Република Северна Македонија, ќе ги имаат сите права, слободи, и привилегии како и секој друг граѓанин и секоја друга заедница, и заедно со другите ќе живеат подеднакво слободни, нагласи Османи.

-И затоа сакам и да упатам порака дека и тие провокации треба да престанат и да укажам дека секое доаѓање во Северна Македонија, со цел навреди кон македонскиот народ, негирање на македонскиот народ, ќе мораме сериозно да го адресираме и тоа да биде последно доаѓање во Северна Македонија. Значи и двете прашања ќе мора подеднакво. Фокусот денеска е на ова насилство врз Христијан коешто мора да го осудиме, и мора да создадеме атмосфера на нула толеранција, но исто така и провокација од политичари кои доаѓаат во Северна Македонија среде Скопје, го негираат македонскиот народ, го навредуваат македонскиот народ, тоа мора да го пркеинеме и тој вициозен циклус во којшто сме влезени мора да престане, дециден е Османи.

Напаѓачот на Пендиков – Илија Спасески доби притвор од 30 дена, а власти ја истражуваат вмешаноста и на уште двајца напаѓачи, јавуваат бугарските медиуми. Од друга страна во декември минатата година на Пендиков му е поднесена кривична пријава за поседување на кокаин, и разврската за ова негово криминално дело е компромитирана со неговото заминување на лекување во Софија, нагласи во саботата адвокатот и поранешен судија Владимир Туфекчиќ објаснувајќи дека две истраги во врска со Пендиков се компромитираат и направен е преседан поради начинот на кој тој е изнесен од државата.