Јапонската компанија „Хонда“ денес соопшти дека нејзината американска подружница повлекла 880.514 возила во САД поради можен дефект на компонентите на задната суспензија, објави американската Национална администрација за безбедност на сообраќајот на автопатиштата (NHTSA).

Повлекувањето вклучува одредени модели на „хонда пилот“ (Honda Pilot), „хонда риџлајн“ (Honda Ridgeline), „хонда пасош“ (Honda Passport) и „акура MDX“ (Acura MDX), објави Ројтерс.

Според регулаторот, постои ризик некои делови од задната суспензија, вклучувајќи ја и задната контролна рачка да откажат. Во овој случај, возачите би можеле да ја изгубат контролата врз возилото, што го зголемува ризикот од сообраќајна несреќа или повреда, додава NHTSA.

САД отвора истрага за 1,4 милиони автомобили Хонда

Овластените сервисни центри ќе ја проверат задната подрамка на возилата „хонда“ и ќе инсталираат комплет за нејзино зајакнување. Доколку е потребно, оштетените компоненти ќе бидат поправени или заменети, без никакви трошоци за сопствениците на возилата, се наведува во соопштението.