Градоначалникот на Општина Центар Горан Герасимовски денеска се сретна со осумте практиканти кои ја поминале селекцијата и започнале практична работа во локалната самоуправа.

„Ме радува што оваа година сите практиканти се од различни струки и се распоредени во соодветните сектори. Тие ќе имаат можност да стекнат искуство во доменот на својата идна професија, да видат како функционира локалната администрација и како се носат одлуки што влијаат врз секојдневниот живот на граѓаните. Воедно, секторите ќе добијат дополнителна поддршка и нова енергија“, истакна Герасимовски.

Тој додаде дека во наредните шест месеци практикантите ќе бидат ангажирани во различни сектори и ќе работат 20 часа неделно, согласно своите студиски програми, а за нивната работа ќе имаат месечен надоместок од 15.000 денари.