Гувернерот на Калининград обвини германски филозоф од 18 век за војната во Украина
Гувернерот на руската ексклава Калининград, Антон Алиханов, открил неочекуван виновник за војната во Украина – германскиот филозоф Имануел Кант (1724-1804).
На конференција на руски политиколози, Алиханов зборувал за „најголемиот син“ на поранешниот пруски град Кенигсберг, кој бил преименуван во Калининград по Втората светска војна, објавија локалните медиуми.
Филозофот од времето на просветителството, најпознат по неговата „Критика на чистиот ум“, бил „еден од најинтелектуалните творци на современиот Запад“, рече гувернерот.
„Би сакал да покажам дека Имануел Кант, кој бил роден овде пред речиси 300 години, има речиси директна врска со глобалниот хаос со кој се занимаваме. Освен тоа, тој има директна врска со воениот конфликт во Украина“ објасни тој.
Кант го отворил патот за морален релативизам, кој на Запад може да го оправда секој чин и секоја неправда, рече Алиханов, додавајќи дека тоа е спротивно на Русија, која се држи до трајните етички вредности.
Родниот град на Кант, Кенигсберг во тогашна Прусија, паднал во рацете на Советскиот Сојуз на крајот на Втората светска војна во 1945 година.
Односот на Русија со филозофот е поделен: од една страна, Кант се смета за туристичка атракција; од друга страна, гробот и споменикот во катедралата пред неколку години биле покриени со графити.